Kawikaan 30:4

 

PINATUTUNAYAN NGA BA SA KAWIKAAN 30:4 NA SI CRISTO AY EXISTIDO NA SA PASIMULA PA?

Kailangang patunayan ng mga nagtuturong si Cristo ay Diyos na ang Panginoong Jesus ay may pre-existencia o existido na (may kalagayan na) bago pa ipanganak ni Maria, bago pa nilalalang ang sanlibutan, sapagkat paano nga naman magiging tunay na Diyos ang Panginoong Jesucristo kung ang Kaniyang existencia ay nagsimula lamang ng ipanganak ni Maria. Ang isa sa mga talata na ginagamit ng mga nagtuturong si Cristo ay Diyos upang ipakitang si Cristo ay may pre-existencia ay ang Kawikaan 30:4. Ganito ang nilalaman ng talata:

“Sino ang sumumpa sa langit, at bumaba?  Sino ang pumisan ng hangin sa kaniyang mga dakot? Sinong nagtali ng tubig sa kaniyang kasuutan? Sinong nagtatag ng lahat ng mga wakas ng lupa? Ano ang kaniyang pangalan, at ano ang pangalan ng kaniyang anak kung iyong nalalaman?”

Sa talatang ito ay may binabanggit daw na “anak” na bago pa pinasimulan ang paglalang ay sumampa sa langit at bumaba. Ayon sa mga naniniwalang si Cristo ay Diyos, ang tinutukoy daw dito na “Anak” ay si Cristo. Samakatiwid, kasama na raw si Cristo ng Ama bago pa pasimulan ang paglalang.

Si Cristo nga ba ang tinutukoy na “anak” sa Kawikaan 30:4 at nagpapatunay nga ba ito na si Cristo ay existido na noon pang una?

Iglesia ni Cristo Answers:

(1)   Walang sinasabi sa talata na si Cristo ay Diyos o Siya ay existido na noon pang una. Walang binabanggit sa talata na si Cristo ang tinutukoy kundi ito’y haka-haka lamang nila.

(2)   Hindi dahil may banggit sa talata na “Anak” ay kay Cristo na tumutkoy. Hindi si Cristo ang tinutukoy na “Anak” sa talata kundi ang bayang Israel.

(3)   Ang banggit naman sa talata na “sasampa sa langit at bababa” ay hindi tumutukoy sa tinawag na “Anak” sa talata, kundi ang Diyos o ang Ama. Walang mababasa sa talata na ang “Anak” na binabanggit ay kasama o katulong sa paglalang o may existencia na sa pasimula pa lamang. Ito’y opinyon o haka-haka lamang nila.

Marahil ay itatanong nila na kung ang Israel ang tinutukoy dito sa Kawikaan 30:4, bakit ang banggit ay “anak” (singular) at hindi “mga anak”? Kung ang banggit daw ay “anak” at hindi “mga anak” kaya tiyak daw na hindi Israel ang tinutukoy sa talata.

Sa Sepruaginta (ang saling Griego ng Matandang Tipan) ang terminong Griego na ginamit na tumutukoy sa banggit na “Anak” o “son” ay “teknois.” Kaya nang isalin ito sa Sir Lancelot Charles Lee Brenton (1807) English Translation of the Septuagint Bible ay “children ang ginamit. Subalit, kahit igiit pa na ang wastong salin sa Ingles ay “son” o “anak,” hindi pa rin mapasisinungalingan na ito ay tumutukoy sa Israel sapagkat ang Israel ay tinawag na “AnaK ng Diyos” sa Exodo 4:22-23:

“At iyong sasabihin kay Faraon, Ganito ang sabi ng Panginoon, Ang Israel ay aking anak, aking panganay: At aking sinabi sa iyo, Pahintulutan mong ang aking anak ay yumaon, upang siya'y makapaglingkod sa akin; at ayaw mo siyang payaunin, narito, aking papatayin ang iyong anak, ang iyong panganay.” (Exodo 4:22-23)

Sa salin namang King James Version ay “son of God” ang mababasa:

“And thou shalt say unto Pharaoh, Thus saith the LORD, Israel is my son, even my firstborn: And I say unto thee, Let my son go, that he may serve me: and if thou refuse to let him go, behold, I will slay thy son, even thy firstborn.” (Exodo 4:22-23 KJV)

Maliwanag kung gayon na hindi ang Panginoong Jesucristo ang tinutukoy na “anak” sa Kawikaan 30:4.