PAYONG KAPATID: Ang Dapat Lalong Pag-ukulan ng Panahon

Kung pinag-uukulan natin ng panahon ang para sa buhay na ito, lalong dapat nating pag-ukulan ng panahon ang para sa ikapagtatamo natin ng kaligtasan

Mayroong ang pinagbubuhusan lamang ng pansin ang pag-aaral sapagkat naniniwala siyang ito ang ikatutupad ng kaniyang mga pangarap. Mayroon naman na ang pinagtutuunan ng pansin ay ang paghahanapbuhay sapagkat naniniwala siyang dito nakasalalay ang kaniyang buhay at ng kaniyang pamilya. Hindi masama na pagtuunan ng pansin ang pag-aaral at ang paghahanapbuhay. Ang masama ay kung puro lamang sa buhay na ito ang bibigyang-pansin.

Ano angkasamaan kapag puro lamang sa buhay na ito ang binibigyang-pansin?

Baka Abutang Hindi Handa

Masama na puro lamang  sa buhay na ito ang binibigyang-pansin sapagkat baka abutan tayo ng Araw ng Paghuhukom na hindi handa:

“Mag-ingat kayo na huwag magumon sa katakawan at paglalasing at mabuhos ang inyong isip sa mga intindihin sa buhay na ito; baka abutan kayo ng Araw na yaon na hindi handa. Sapagkat darating iyon nang di inaasahan ng tao sa buong daigdig.” (Lukas 21:34-35 MB)

Hindi masama ang pagtuunan ng pansin ang ukol sa buhay na ito alo na’t may kinalaman sa ikapagtatamo ng magandang kinabukasan at ikatutugon ng pangangailangan ng pamilya, subalit kung mabubuhos ang isip sa mga intindihin sa buhay na ito na dahil dito ay aabutan ng Araw ng Paghuhukom na hindi handa, iyan ang masama sapagkat kapahamakan ang kahihinatnan ng mga ang pinag-ukulan lamang ay ang mga bagay na panlupa:

“Kapahamakan ang kahihinatnan nila sapagkat ang dinidiyos nila ay ang hilig ng kanilang katawan. Ikinararangal nila ang mga bagay na dapat sana nilang ikahiya at ang pinag-uukulan lang nila ng pansin ay ang mga bagay na panlupa.” (Filipos 3:19 MB)

Hindi lamang mawawalan ng kabuluhan ang pinagpagalan ng tao sa Araw ng Paghuhukom, kundi ang mga gayun ay mapapahamak at hindi maliligtas. Kaya, inaaralan tayo na maging handa sa lahat ng oras:

Kaya't maging handa kayo sa lahat ng oras.  Lagi ninyong idalangin na magkaroon kayo ng lakas upang makaligtas sa lahat ng mangyayaring ito at makaharap sa Anak ng Tao." (Lukas 21:36 MB)

Ano ang ipinagagawa sa atin upang hindi tayo mapahamak sa Araw ng Paghuhukom? Ang maging handa sa lahat ng oras. Kung paanong naghahanda tayo sa pagdating ng isang kalamidad, kahirapan o kaguluhan upang maligtas sa kapahamakan, lalong dapat tayong maghanda sa pagdating ng Araw ng Paghuhukom upang huwag mapahamak sa araw na iyon.

Dapat tayong maging laging handa sa lahat ng oras sapagkat walang nakaaalam ng pagdating ng araw na iyon. Kung magkagayon man, ipinagpauna na sa atin ng Biblia ang mga palatandaan na nagbabadiya na malapit na ang Araw ng Paghuhukom – mga  digmaan, kahirapan, kaguluhan, kagutom at paglindol sa iba’t ibang dako (Mateo 24:3 at 33 at 6-8). Hindi ba’t ngayon ay pawang nakikita na natin na nagaganap ang mga bagay na ito? Samakatuwid, ngayon higit sa lahat dapat maging handa sapagkat totoong napakalapit na natin sAraw ng Paghuhukom.

Sino ang aabutang hindi handa? Ang para lamang sa buhay na ito ang binibigyang pansin. Kaya, kung pinag-uukulan natin ng panahon ang para sa buhay na ito, lalo nating dapat nating pag-ukulan ng panahon ang para sa ikapagtatamo ng kaligtasan o ang maging handa sa pagdating ng Araw ng paghuhukom.

Ang Abutang Handa

Ang aabuting handa at siyang magiging mapalad sa Araw ng paghuhukom ay aabutin o masusumpungang sa kapayapaan na walang dungis at walang kapintasan:

“Kaya nga, mga minamahal, yamang kayo'y nagsisipaghintay ng mga bagay na ito, ay pagsikapan ninyong masumpungan kayo sa kapayapaan, na walang dungis at walang kapintasan sa paningin niya.” (II Pedro 3:14)

Ang aabutang handa na magiging mapalad ay ang aabutan o masusumpungang nasa kapayapaan na naa katawan ni Cristo:

“At maghari sa inyong puso ang kapayapaan ni Cristo, na diya'y tinawag din naman kayo sa isang katawan; at kayo'y maging mapagpasalamat.” (Colosas 3:15 )

Ang katawan ay ang Iglesia na si Cristo ang ulo (Col. 1:18), na tinatawag sunod kay Cristo bilang  kaniyang ulo o puno – tinatawag na Iglesia ni Cristo (Roma 16:16 NPV). Kaya dapat tayong bautan ng Araw ng Paghuhukom o masumpungan ng ikalawang pagparito ni Cristo na nanananatili sa loob ng Iglesia ni Cristo na walang dungis at kapintasan.

Paano natin mapaninindiganan ang ating pagka-Iglesia ni Cristo dumating man ang mga balakid, mga pagsubok at kabalisahan? Sa Awit 25:1 ay ganito ang ating mababasa:

“Ang mga nagtitiwala sa PANGINOON ay tulad ng Bundok ng Sion, na di matitinag kundi mananatili magpakailanman.” Awit 125:1 NPV

Ang nagtitiwala sa Diyos ang hindi matitinig bagkus ay mananatili magpakailanman. Kaya, upang mapanindiganan natin ang ating pagka-Iglesia ni Cristo at huwag itong maipagpalit sa anuman o sa kaninuman, ilagak nating lubos ang ating pagtitiwala sa ating Diyos. Ang nagtitiwala ay ang magpapatuloy anuman ang dumating sa kaniyang buhay; ang mananatili sa kasiglahan sa paglilingkod at pagsamba sa Diyos; ang sa Diyos itinitiwala ang kaniyang buhay at sambahayan; at ang sa Diyos inilalagak ang lahat ng suliranin at bagabag.

Anupa’t. kung [pinagtutuunan natin ng pansin at panahon ang ukol sa buhay na ito (ang pag-aaral at ang paghahanapbuhay), pagtuunan din natin ng pansin at huwag pabayaan ang ating pagka-Iglesia ni Cristo, ang pagsamba at paglilingkod sa Diyos.