I Corinto 10:4 at Exodo 17:5-6

Si Cristo ba ang “Bato” na Kung Saan Nakainom ang Bayang Israel noon sa Panahon ni Moises?

Sister Periwinlke Diaz Asked:

“Magandang araw po. Sabi po kasi ng mga taga sanlibutan may existence na raw po si Jesus bago pa lalangin ang daigdig. Katunayan nga raw po ay sya ang bato na gumabay kila Moses sa 1Cor 10:4…?”

The Pristine Truth Answers:

Ang mga nagtuturong si Cristo ay Diyos ay kailangang mapatunayan nila na si Cristo ay existido na noon pang una (bago pa ipanganak ni Maria) sapagkat paano nga naman Siya magiging Diyos kung hindi pa Siya existido noong una. Ang isa sa halimbawa ng ginagamit nila parapatunayan na si Cristo ay existido na noon pang una ay ang I Corinto 10:4 na iniuugnay nila sa Exodo 17:5-6:

 “At lahat ay nagsiinom ng isang inumin ding ayon sa espiritu; sapagka't nagsiinom sa batong ayon sa espiritu na sumunod sa kanila: at ang batong yaon ay si Cristo.” (I Corinto 10:4)

Sa talatang ito ay sinasabing “ang batong yaon ay si Cristo.” Ang tinutukoy daw na “bato” ay ang nasa Exodo 17:5-6:

“At sinabi ng Panginoon kay Moises, Dumaan ka sa harap ng bayan, at ipagsama mo ang mga matanda sa Israel; at ang iyong tungkod na iyong ipinalo sa ilog, ay tangnan mo sa iyong kamay, at yumaon ka. Narito, ako'y tatayo sa harap mo roon sa ibabaw ng bato sa Horeb; at iyong papaluin ang bato, at lalabasan ng tubig, upang ang bayan ay makainom.  At gayon ginawa ni Moises sa paningin ng mga matanda sa Israel.” (Exodo 17:5-6)

Kung si Cristo daw ang “bato” na mula rito nakainom ang mga Israelita nangsila’y nasa paglalakbay sa ilang sa panahon ni Moises, kaya ang konklusyon nila ay si Cristo raw ay existido na noon pang una? Tama ba sila?

Sa paggamit nila ng talatang ito para patunayan na si Cristo ay Diyos at existido na noong una pa ay naghahayag na hindi nila sinusuring mabuti ang mga talata ng Biblia kundi basta sa tingin nila’y magagamit nila para patunayan ang kanilang paniniwala ay gagamitin na nila. Ang totoo, sa paggamit nila ng mga talatang ito ay hindi lamang inihahayag na hindi na nila sinusuring mabuti ang mga talatang kanilang ginagamit, kundi wala pa silang pakundangan kung sila man ay lumabas na katawa-tawa. Ano po ang katunayan?

Pag-isipan ninyong mabuti ang mgasumusunod:

(1)   Walang sinasabi sa I Corinto 10:4 at sa Exodo 17:5-6 na si Cristo ay Diyos at existido na noon pang una. Ito ay pagkaunawa, haka-haka o pakahulugan lamang nila sa mga talata ng Biblia.

(2)   Kung tatanggapin natin na si Cristo mismo ang batong sa pamamagitan niyaon ay nakainom ang bayang Israel, lalabas na pinalo ni Moises si Cristo, sapagkat ang batong binabanggit sa Exodo 17:5-6 ay pinalo ni Moises ayon sa ipinag-uutos ng Panginoon.

“At sinabi ng Panginoon kay Moises, Dumaan ka sa harap ng bayan, at ipagsama mo ang mga matanda sa Israel; at ang iyong tungkod na iyong ipinalo sa ilog, ay tangnan mo sa iyong kamay, at yumaon ka. Narito, ako'y tatayo sa harap mo roon sa ibabaw ng bato sa Horeb; at iyong papaluin ang bato, at lalabasan ng tubig, upang ang bayan ay makainom.  At gayon ginawa ni Moises sa paningin ng mga matanda sa Israel.” (Exodo 17:5-6, amin ang pagbibigay-diin)

(3)   Ayon naman sa I Cor. 10:4, si Cristo ay hindi literal na bato kundi batong “ayon sa espiritu”:

 “At lahat ay nagsiinom ng isang inumin ding ayon sa espiritu; sapagka't nagsiinom sa batong ayon sa espiritu na sumunod sa kanila: at ang batong yaon ay si Cristo.” (I Corinto 10:4)

Sa Magandang Balita Biblia ay “batong espirituwal” ang banggit:

“At uminom din ng iisang inuming espirituwal, mula sa Batong espirituwal na sumubaybay sa kanila, at ang Batong iyon ay si Cristo.” (I Corinto 10:4 MB)

Ang “batong” pinalo ni Moises at kung saan lumabas ang tubig at dahil doon ay nakainom ang bayang israel noong naglalakbay sila sa ilang ay talagang bato, literal na bato. Samantalang ang binabanggit sa I Corinto 10:4 ay “batong ayon sa espiritu” o “espirituwal na bato” na ito nga ang Panginoong Jesucristo.

Kaya naman tinawag si Cristo na “batong espirituwal” ay sapagkat nagbibigay ng tubig na buhay:

“Sumagot si Jesus at sa kaniya'y sinabi, Kung napagkikilala mo ang kaloob ng Dios, at kung sino ang sa iyo'y nagsasabi, Painumin mo ako; ikaw ay hihingi sa kaniya,  at ikaw ay bibigyan niya ng tubig na buhay.” (Juan 4:10)

Ang pag-inom kay Cristo ay ang pagsampalataya sa Kaniya:

“Nang huling araw nga, na dakilang araw ng kapistahan, si Jesus ay tumayo at sumigaw, na nagsasabi, Kung ang sinomang tao'y nauuhaw, ay pumarito siya sa akin, at uminom. Ang sumasampalataya sa akin, gaya ng sinasabi ng kasulatan, ay mula sa loob niya ay aagos ang mga ilog ng tubig na buhay. Ngunit ito'y sinalita niya tungkol sa Espiritu, na tatanggapin ng mga magsisisampalataya sa kaniya: sapagka't hindi pa ipinagkakaloob ang Espiritu; sapagka't si Jesus ay hindi pa niluluwalhati.” (Juan 7:37-39)

Kaya ginawa ni Apostol Pablo ang paghahalintulad ay sapagkat ang mga pangyayari nang una ay anino ng darating: (Col. 2:16-17 MB).

“Kaya't huwag na kayong pasasakop sa anumang tuntunin tungkol sa pagkain o inumin, tungkol sa kapistahan, sa bagong buwan o sa Araw ng Pamamahinga. Ang mga ito'y anino lamang ng mga bagay na darating at si Cristo ang kaganapan nito.” (Colosas 2:16-17 MB)