Is the INC Arbitrary In Their Explanation Of Biblical Prophecies?

Tanungan:

Arbitrary Ba Ang Iglesia Ni Cristo Sa Pagpapaliwanag Sa Hula Ng Biblia?

Ojradn Asked:

OjradnDisyembre 7, 2012 20:37

"bakit kaung mga INC ay namimili kung alin ang simbolik at literal kpag hula ang pinaguusapan? 

 

Iglesia Ni Cristo Answers:

Hindi po kailanman ginawa ng Iglesia ni Cristo na siyang “mamili” kung alin ang “simbolik” (o "simbolikal”) at kung alin ang literal. 

Hindi po kailanman nagbibigay ng pansariling paliwanag, opinyon o haka-haka ang Iglesia ni Cristo ukol sa sinasabi ng Biblia, lalo na ang mga hula ng Biblia. Ganito po ang pagtuturo sa amin ni kapatid na Felix Y. Manalo sa kaniyang sermon na pinamagatang “Kung Nasaan ang mga Patay”:

“Kaya’t hindi ipinahihintulot sa Iglesia ni Cristo sa pagsasalita ay magsalita ng bawat kaniyang maibigan. Ang kailangan sa pagsasalita ay basahin ang aral ng Diyos. Iyon (ang Biblia) ang tignan. Kung ano ang sinasabi roon (sa Biblia) iyon ang dapat sundin. Hindi mabuti na ang tao ang nag-iisplika, nagpapaliwanag, Hindi ganiyan.”

Ang Iglesia ni Cristo ay hindi kailanman nagbibigay ng sariling paliwanag (opinyon o haka-haka) lalo na sa mga hula ng Biblia sapagkat mahigpit itong ipinagbabawal ng Diyos:

“Na maalaman muna ito, na alin mang hula ng kasulatan ay hindi nagbuhat sa sariling pagpapaliwanag.” (II Pedro 1:20)

Samakatuwid, kung mayroon mang binabanggit sa hula ng Biblia na “simbolikal” at “literal,” hindi po namin ito paliwang o pakahulugan kundi ito po ang itinakda ng Diyos. Talagang sa hula ng Biblia ay may banggit na “simbolikal” at “literal” gaya po ng binabanggit sa Isaias 40:3:

“Ang tinig ng isang sumisigaw, Ihanda ninyo sa ilang ang daan ng Panginoon pantayin ninyo sa ilang ang lansangan para sa ating Dios.” (Isaias 40:3)

Ang katuparan po ng hinuhulaan ng Biblia na “tinig” na sumisigaw sa “ilang” ay si Juan bautista:

“At ito ang patotoo ni Juan, nang suguin sa kaniya ng mga Judio mula sa Jerusalem ang mga saserdote at mga Levita upang sa kaniya'y itanong, Sino ka baga? At kaniyang ipinahayag, at hindi ikinaila; at kaniyang ipinahayag, Hindi ako ang Cristo. At sa kaniya'y kanilang itinanong, Kung gayo'y ano nga? Ikaw baga'y si Elias? At sinabi niya, Hindi ako. Ikaw baga ang propeta? At siya'y sumagot, Hindi. 22Sinabi nga nila sa kaniya, Sino ka baga? upang ibigay namin ang kasagutan sa nangagsugo sa amin. Ano ang sinasabi mo tungkol sa iyong sarili? Sinabi niya, Ako ang tinig ng isang humihiyaw sa ilang, Tuwirin ninyo ang daan ng Panginoon, gaya ng sinabi ng propeta Isaias.” (juan 1:19-22)

Si Juan Bautista ay nangaral sa “Ilang ng Judea” (Mateo 3:1). Nang siya’y tanungin kung “sino siya,” ang patotoong ibinigay niya ay siya ang katuparanng hinuhulaan ni Propeta isaias na “tinig na sumusigaw sa ilang.” Pansinin na ang binanggit sa hula ni Propeta Isaias na “tinig” ay si Juan Bautista ang katuparan (“simbolikal”), at ang katuparan ng “ilang” ay ang “Ilang ng Judea” (“literal”). Si Juan Bautista mismo ang nagsabing siya ang katuparan nito. Ibig bang sabihin ay siya ang namili kung alin ang simbolikal at alin ang literal? Alam nating hindi.

Samakatuwid, talagang sa mga hula ng Biblia ay mayroong binabanggit na “simbolikal” at mayroong binabanggit na “literal.” Sa mga hula ng Biblia na nagpapatotoo sa pagka-sugo ng Diyos ni kapatid na Felix Y. Manalo at sa kahalalan ng Iglesia ni Cristo, kung mayroong banggit na “simbolikal” at “literal” ay hindi kami ang “pumili” o nagpaliwanag lamang nito. Ang mga “hulang” ito ay galing sa Diyos, kaya gayun ito itinakda ng Diyos, at ang katuparan ay si kapatid na Felix Y. manalo at ang Iglesia ni Cristo sa mga Huling Araw.